Antworten aus dem BuLa

Von Zolliker Zumiker Bote ‒ 2. August 2022

Julian Rengel (Pfadiname «Thor») und Jules Müller (Pfadiname «Pan») stellen den kleinen Pfadfindern im Walliser Goms ein paar Fragen. Das sind ihre Antworten.

Was isch dis absolute Bula-Highlight?

Kolombo: «Mir sind als Pios as Volleyball-Turnier vom Korps Pfannestil gange. Mit eme zwei Meter grosse Pfadi und eme richtig guete Smasher hemmer das mitm Rest vom Team grad gunne.»

Lieblingsesse?

Twist: «5P-Pasta vode Pios (13-,14-Jährigi), wo a dem Tag die Chuchi usghulfe hend.»

Was hesch du im BULA uf Italienisch glernt?

Thor: «Cosa fai?!»

Was hesch du im BULA uf Französisch glernt?

Solex: «Nüt! Ich chan scho alles.»

Was isch dis Lieblings-BULA-Zitat?

Zilly: «I continenti sono fuori controllo!»

I wellere Nacht hesch am beste pfuused?

Ventus: «Das isch die zweit Nacht gsi. Mir hend Schlafstrategie gwechset und zwar vo viel Chleider azieh zu möglichst wenig im Schlafsack aha. Nachher    hemmer mega warm gha und super gschlafe!»

Hesch du es Plüschtierli mitgno und wie heissts?

Tschippa: «Ja sicher, es heisst Panda! De Name hets, will d’Chatz vo mine Cousins so gheisse het und mis Tierli genauso usgseht.»

Wie oft hesch du scho Socke gwechslet?

Gizmo (ganz stolz): «Scho drü mal!»

Wie lang würsch du no welle da im mova lebe?

Argon: «So eis bis zwei Mönet fändi scho cool!»

Hesch du scho neui Pfadifründe gfunde?

Stitch: «Jaa, sicher! Ich ha de Skipper vo eusne Nachbare kenneglernt und au eine wo au Stitch heisst!»

Lieblings-Bula-Song?

Peak: «Mova, on y va!»

Was hesch du vonere andere Pfadi glernt?

Kali: «Es mega cools Spiel namens Bäumliküsse.»

Was het dich bis jetzt am meiste gfreut da im Bula?

Zazoo: «Sooo viel! Da chani gar nüt uswähle!»

Wer isch vo dinere Familie alles an Bsuechstag cho?

Groot: «Mis Mami, min Papi, mini Tante, min Onkel, ah und nöd zum Vergesse no mini Grosseltere.»